हिन्दी, इंग्लिश और उर्दू में आसफ़ के अर्थदेखिए

آصف اس لفظ کے صحیح معنی اور تلفظ کے بارے میں اختلاف ہے۔ کچھ لوگ اسے سوم مفتوح کے ساتھ (بروزن’’واپس‘‘) بولتے ہیں۔عربی میں یہی تلفظ رائج ہے۔ لیکن اردو کے لئے اب یہ محض تکلف ہے، کیوں کہ زیادہ تر لوگوں کی زبان پر یہ بکسر سوم ہی ہے۔ آج کل اگر کسی کا نام ’’آصف‘‘ رکھا جاتا ہے تواس کا بھی تلفظ بکسر سوم ہی کرتے ہیں۔ لہٰذا اردو میں اس لفظ کا رائج تلفظ بکسر سوم (بروزن ’’بارش‘‘) ہے اور وہی اب مرجح ہے۔ جہاں تک سوال معنی کا ہے، تو اتنا ہی معلوم ہے کہ یہ برخیا نام کے ایک بزرگ کے بیٹے کا نام تھا، اورآصف بن برخیا کو حضرت سلیمان ؑ نے اپنا وزیر مقرر کیا تھا۔ بعض کا خیال ہے’’آصف‘‘ لفظ عبرانی ہے اور عربی میں اسے’’کبر‘‘ (اول دوم مفتوح) کہتے ہیں جو ایک پھل ہوتا ہے، ترشی مائل۔ بہرحال، اردو میں اس کے کچھ معنی نہیں، کبھی کبھی استعارۃً ’’نہایت عقل مند یا زیرک شخص‘‘ کے معنی میں بول دیتے ہیں۔ میر نے کیا خوب استعمال کیا ہے ؎ خالی پڑا ہے خانۂ دولت وزیر کا باور نہ ہو تو آصف آصف پکار دیکھ یہاں کئی باریکیاں ہیں۔ نواب آصف الدولہ کو ’’نواب وزیر‘‘ کہتے تھے، اور ان کے بعد چند مہینوں کے لئے وزیراعلیٰ خاں مسند نشین ہوئے تھے۔پھر آصف الدولہ کے ایک محل کا نام ’’دولت خانہ‘‘ تھا۔

ماخذ: لغات روز مرہ    
مصنف: شمس الرحمن فاروقی