हिन्दी, इंग्लिश और उर्दू में चुके के अर्थदेखिए

چکے اب ہندی/انگریزی کے زیراثراردو والے ایک نئے بھونڈے پن کو رواج دینا چاہتے ہیں۔ جیسا کہ ہم جانتے ہیں، اردو میں فعل مجہول کا استعمال بہت کم ہوتا ہے، اور اس کی صورتیں عموماً مقرر ہیں۔ انگریزی میں فعل مجہول بہت ہے اور اس کی دیکھا دیکھا دیکھی ہندی والے اسے اختیار کررہے ہیں۔ اردو والے بھی ہندی کی چال چلنے کے فیشن میں مبتلا ہوتے جاتے ہیں، لہٰذا اب اردو میں اس طرح کے جملے بھی لکھے جاتے ہیں: کئی بار سزا پا چکے مجرم بھی وہاں آتے ہیں۔ پانچ کتابیں لکھ چکے جناب زید نے کہا۔ دہرا چکے سبق کو نہ دہراؤ۔ سات میچ کھیل چکے کھلاڑی نے کہا۔ یہ سب استعمالات غلط اور قبیح ہیں۔ صحیح صورتیں یہ ہیں: کئی بار سزا یافتہ۔۔۔ پانچ کتابوں کے مصنف۔۔۔ دہرائے ہوئے سبق۔۔۔ سات میچ کھیلے ہوئے۔۔۔ دوسرے الفاظ میں، ماضی فعل مجہو ل کی جگہ کوئی اسم استعمال کرنا چاہئے، یافعل صفت استعمال کرنا چاہئے۔ اور تمام صورتیں اردو کے لئے ناواجب ہیں۔

ماخذ: لغات روز مرہ    
مصنف: شمس الرحمن فاروقی