اردو، انگلش اور ہندی میں بِسْکُٹ کے معانیدیکھیے

بسکٹ اردو میں یہ لفظ اول کے کسرہ اور سوئم کے ضمہ کے ساتھ بولتے ہیں (biskut) لیکن اس لفظ کے جدید انگریزی تلفظ میں سوم مکسور ہے۔ اٹھارویں صدی تک انگریزی میں اس کا تلفظ bisket بروزن’’پیکٹ‘‘ تھا، اور جنوبی ہندوستان کے علاقوں میں اب بھی ہے۔ یعنی وہاں کے انگریزی جاننے والے اسے عموماً bisket بولتے ہیں۔ انگلستان کی انگریزی میں اس کا تلفظ biskit کیوں ہوا، اس باب میں قیاس آرائی ہی ممکن ہے۔ فرانسیسی میں اس لفظ کو ’’بسک + وی‘‘ (biskwi) بولتے ہیں۔ شاید وہاں کا کچھ اثر لے کر انگریزوں نے biskit کہنا شروع کردیا ہو۔ لیکن سچ یہ ہے کہ یہ محض کمزور سا قیاس ہے۔ اس سے بڑا معمہ یہ ہے کہ اردو میں یہ biskut کیسے بن گیا؟ مصحفی ؎ ٹانگن تو ترا یوں ہی صنم جائے ہے کھٹ کھٹ کس واسطے پھر تو اسے دوڑائے ہے بگٹٹ ہےیہ فلک سفلہ وہ پھیکا سا فرنگی رکھتا ہے مہ و خور سے جو ساتھ اپنے دو بسکٹ اس وقت تو یہی خیال کیا جا سکتا ہے کہ ہم لوگوں نے یہ لفظ انگریزوں سے سن کر نہیں، بلکہ کسی فرانسیسی کتاب میں لکھا دیکھ کر حاصل کیا ہوگا۔ یعنی پہلے ہم لوگ ’’بسکوئٹ‘‘ (biskwit) بولتے رہے ہوں گے، بعد میں کثرت استعمال سے’’بسکٹ‘‘(biskut) ہوگیا۔ فرانسیسی سے واقفیت زیادہ نہ رکھنے کی وجہ سے یہ نہ معلوم رہا ہو گا کہ فرانسیسی ’’بسک وی‘‘ میں آخری حرف نہیں بولا جائے گا۔ اس کے معنی یہ ہوئے کہ ہم لوگوں نے اس لفظ میںT کا حرف فرانسیسی زبان سے لیا، اور UI کا تلفظ (یعنی کسرۂ خالص=I) انگریزی سے حاصل کیا۔ ظاہر ہے کہ اس سے بعید از قیاس بات کیا ہو گی۔ لہٰذا موجودہ اطلاعات کی روشنی میں یہ کہنا ممکن نہیں کہ ہم لوگوں نے یہ تلفظ (اول مکسور، سوم مضموم) کہاں سے حاصل کیا۔

ماخذ: لغات روز مرہ    
مصنف: شمس الرحمن فاروقی