اردو، انگلش اور ہندی میں مِلیَن کے معانیدیکھیے

ملین انگریزی میں اوسط درجے کی بڑی گنتی کے لئے کوئی لفظ نہیں۔ ان کے یہاں بڑی گنتی کا پہلا لفظ Million ہے جو ’’دس لاکھ‘‘ کے معنی دیتا ہے۔ اس کے بعد Billion ہے، جس کے معنی’’ہزارملین، یا دس ہزار لاکھ‘‘ (امریکہ) یا (شاذ، لیکن برٹش انگریزی میں) ’’دس لاکھ دس لاکھ ‘‘ ہیں۔ ان کے برخلاف، متوسط بڑی گنتیوں کے لئے ہمارے یہاں ’’لاکھ‘‘ (سو ہزار) اور’’کروڑ‘‘ (سو لاکھ) ہیں۔ بڑی گنتی کے لئے ہمارے یہاں پہلا لفظ ’’ارب‘‘ (سو کروڑ) ہے۔ ظاہر ہے کہ (مثلاً) ’’ستاون لاکھ سرسٹھ ہزار‘‘ کہنا اور سمجھنا آسان ہے، بہ نسبت ’’پانچ اعشاریہ سات چھہ سات ملین‘‘ (5.767 Million) کہنے کے۔ لیکن نہ معلوم کس وجہ سے پاکستان میں لاکھ اور کروڑ کی جگہ ’’ملین‘‘ رائج کرنے کی کوشش کی جارہی ہے۔ بعض اہل ہند بھی اس معاملے میں پاکستان کی نقل کرتے ہیں۔ ’’ملین‘‘ غیر زبان کا لفظ ہے، اور ہمارے یہاں اس کے معنی کو بیان کرنے کے لئے اس سے بہتر وسائل موجود ہیں۔ پھر’’ملین‘‘ کو ٹھونسنے اورتین اچھے خاصے لفظوں کو جلا وطن کرنے میں کس کا فائدہ ہے؟

ماخذ: لغات روز مرہ    
مصنف: شمس الرحمن فاروقی